Kurengera akayunguruzo k’imirasire y’izuba biri mu nyungu za buri wese

Ku itariki ya 16 Nzeri 2020 U Rwanda rwifatanyije n’isi mu kwizihiza umunsi mpuzamahanga wo kurengera akayunguruzo k’imirasire y’izuba.

Hashize imyaka 35 hatangijwe ingamba zo kurengera no kurwanya iyangirika ry’akayunguruzo k’imirasire y’izuba. Isinywa ry’Amasezerano ya Montreal yerekeye ibintu bihumanya akayunguruzo k’imirasire y’izuba yasinywe mu mwaka wa 1987, ni imwe mu ntambwe zikomeye zatewe mu kurengera isi n’abayituye.

Gukurikiza Amasezerano ya Montreal birokora ubuzima bw’abantu n’urusobe rw’ibinyabuzima nk’uko Umunyambabanga Uhoraho muri Minisiteri y’Ibidukikije, Karera Patrick yabyibukije mu muhango wo kwizihiza uyu munsi wabaye mu buryo bw’ikoranabuhanga.

Yagize ati “Mu myaka isaga 30 ishize, ibihugu byasinye ayo masezerano byagiye bigabanya ibikorwa byangizaga akayunguruzo k’imirasire y’izuba, birokora ubuzima bw’abantu babarirwa muri miriyoni ebyiri bashoboraga kurwara kanseri y’uruhu buri mwaka. Uretse kurokora ubuzima bw’abantu, ingamba zo kurwanya iyangirika ry’akayunguruzo k’imirasire y’izuba zanafashije mu kurengera urusobe rw’ibinyabuzima n’umusaruro w’ibikomoka ku buhinzi.”

Biteganyijwe ko hagati muri iki kinyejana cya 21, akayunguruzo k’imirasire y’izuba kazongera kumera nk’uko kahoze mu myaka ya 1980 kubera ingamba zashyizweho zo kukabungabunga.

U Rwanda rwasinye amasezerano ya Montreal mu mwaka wa 2003, nyuma y’imyaka 13 rwakira inama ya 28 y’ibihugu byasinye amasezerano ya Montreal (MOP28).

Muri iyi nama yabaye mu Ukwakira 2016, hemejwe Ivugurura ry’Amasezerano ya Montreal ryitiriwe Kigali - Kigali Amendment - hagamijwe gusaba ibihugu guhagarika  burundu ikoreshwa gazi zangiza akayunguruzo k’imirasire y’izuba, hemezwa gutangira gukoresha gazi karemano. Uyu munsi Ivugurura rya Kigali rimaze kwemezwa burundu n’ibihugu birenga ijana.

Ikigo cy’igihugu cyo kubungabunga ibidukikije REMA ku bufatanye n’abafatanyabikorwa bacyo mu kurengera ibidukikije, cyakoze ibarura rigamije kureba ibikoresho bikonjesha biri mu Rwanda kugira ngo ibivuye mu ibarura bishingirweho mu gufata ingamba zo kuvana ku isoko ry’u Rwanda gazi zangiza akayunguruzo k’imirasire y’izuba.

U Rwanda kandi ku bufatanye n’Ishami ry’Umuryango w’Abibumbye Rishinzwe Ibidukikije rwashyizeho ingamba zerekeye uburyo bwo gukonjesha (National Cooling strategy). Minisiteri y’ibidukikije ibinyujije muri REMA yashyizeho uburyo bw’ikoranabuhanga buhuriraho abacuruzi batumiza ibyo bikoresho mu mahanga, abashinzwe ibyinjira n’ibisohoka kuri za gasutamo n’abashinzwe ibijyanye n’ubuziranenge.

Umuyobozi wungirije wa REMA avuga ko kurengera akayunguruzo k’imirasire y’izuba ari uruhare rwa buri wese, yagize ati “Abanyarwanda muri rusange bakwiye kwirinda kugura ibikoresho bikonjesha bitemewe, abacuruzi nabo bakareka kwinjiza mu Rwanda ibyuma bikonjesha byakwangiza akayunguruzo k’imirasire y’izuba, ndetse n’inzego za leta zigasabwa kumva ko ikibazo cy’iyangirika ry’akayunguruzo k’imirasire y’izuba kitareba REMA gusa”

Mu gihe hatafatwa ingamba zihuse mu kurwanya no guhagarika ibikoresho byohereza imyuka yangiza akayunguruzo k’imirasire y’izuba, iyo myuka yazaba yariyongereye ku rugero rwa 95% mu mwaka wa 2050.

Inkuru nziza ni uko gukoresha ibikoresho bikonjesha bitohereza imyuka yangiza akayunguruzo k’imirasire y’izuba bihendutse kuko bishobora gutuma abantu bazigama miliyari hafi ibihumbi bitatu (2.9 trillion) z’amadorari kugeza mu mwaka wa 2050.

 

 

 

Back